Kryeministri u bëri apel atyre që do të protestojnë që të kenë parasysh bashkëjetesën dhe tolerancën ndër-fetare.
"Çdo kush që proteston duhet të ketë kujdes në përgjegjësinë e tij pasi jeton në një shoqëri demokratike dhe duhet të ketë kujdes të mos bie pre e manipulimeve ose ndonjë agjende të huaj. Maqedonia është shtet multi-etnik, multi-fetar, multi-konfesional, jetojmë bashkë dhe do të vazhdojmë të jetojmë bashkë. Duhet të mendohet edhe për ditën pas, kështu që i bëj apel protestuesve të ditës së nesërme, duke shprehur mendimin e tyre për atë për cilën protestojnë, të kenë kujdes në përgjegjësin e tyre personale", deklaroi Nikolla Gruevski, kryeministër i Maqedonisë.
I pyetur për gjendjen e sigurisë në vend, pas aksionit policor ‘Monstrum’, numri një i ekzekutivit Gruevski, tha se policia është duke e mbajtur gjendjen nën kontroll.
"Për të do të bisedoni edhe me ministren e punëve të brendshme, por kryesorja punët po vëzhgohen", u shpreh Nikolla Gruevski, kryeministër i Maqedonisë.
Për të premten në rrjetet sociale janë paralajmëruar protesta në të gjitha qytetet e banuara me shqiptarë duke filluar nga Kumanova, Shkupi, Tetova, Gostivari, Dibra e Struga, për të shprehur revoltën ndaj arrestimit të shqiptarëve të pafajshëm. Protestat parashihen të fillojnë pas faljes së namazit të xhumasë në ora 13:30. Ndërkohë për një ditë më vonë, për ditën e shtunë janë paralajmëruar gjithashtu anti - protesta nga qytetarë maqedonas. Alsat-M
