Lëvizje të mëdha janë duke ndodhur në skenën politike në Maqedoni. Vetëm disa javë para se të mbahen zgjedhjet presidenciale në vend, partitë politike kanë filluar kalkulimet e ndryshme në mënyrë që të dalin fituese.
E për të fituar, shpesh mjeti arsyeton qëllimin. Takime të shpeshta muajve të fundit janë realizuar ndërmjet liderit të PDSH-së, Menduh Thaçi dhe njeriut të parë të Policisë Sekrete, Sasho Mijallkov. Ky i fundit është njëkohësisht edhe anëtar i Komitetit Qendror të VMRO - DPMNE –së së Kryeministrit Nikolla Gruevski.
Duke shfrytëzuar ditën e diel që ishte edhe ditë pushimi, të dy këta liderë janë takuar dhe kanë darkuar së bashku në restorantin “Sushiko” në Shkup, njofton portali Libertas.
Informacionet e fundit janë se në restorant ata kanë hyrë brenda nga dera e pasme. Edhe pse VMRO-DPMNE është në koalicion qeveritar me BDI-në, bojkoti i PDSH-së për zgjedhjet presidenciale ka bërë që partia më e madhe maqedonase të interesohet për partinë opozitare shqiptare.
Në këtë mënyrë, Menduh Thaçi i ndihmon VMRO-së në zgjedhjet presidenciale. Kështu së paku thuhet jozyrtarisht, kurse partia maqedonase në pushtet do t’i ndihmojë PDSH-së në zgjedhjet e mundshme të parakohshme parlamentare.
Në këtë mënyrë, PDSH-ja nëse siguron vota të konsiderueshme mund të bëhet në të ardhmen edhe pjesë e pushtetit. Ndonëse në lidhje me këtë çështje nuk ka diçka konkrete dhe zyrtare, lëvizjet e fundit politike çojnë në atë drejtim.

/zhurnal/