‘Kacafyten’ Ramiz Lladrovci me hoxhë mulla Osmanin

Ka vazhduar polemika mes kryetarit të Komunës së Drenasit, Ramiz Lladrovci, dhe hoxhës Osman Musliu, pas deklaratës së këtij të fundit i cili drejtoi lutje tek Zoti që Lladrovci të mos fitojë edhe një mandat për të udhëhequr me Drenasin.

Lidhur me këtë deklaratë reagoi Lladrovci, duke e quajtur rrenc hoxhën nga Drenasi. “Është fat që Zoti nuk i dëgjon lutjet e rrencave, po t’i kishte dëgjuar, më 2007 Mulla rrenci do të ishte bërë kryetar i komunës.

Reklame

Por, jo, as Zoti, as qytetarët nuk u mashtruan”, ka thënë Lladrovci. I pari i Drenasit ka thënë se shpreson që Zoti ‘ta kthejë në rrugë të drejtë’. “Mulla rrenci nuk është i vetmi i verbuar nga padituria në komunë që nuk i sheh projektet e realizuara dhe ato në realizim. Komenti im është: Do Zoti e kthen në rrugën e drejtë, bile deri në Bajramin tjetër”, ka thënë Lladrovci.

E lidhur me këtë, media ka kontaktuar me hoxhën Osman, i cili drejtoi akuza të rënda për Lladrovcin, duke thënë se ai është në këtë pozitë falë familjes së tij. “Ani me babën hoxhë ani, mirë e ki ti! I kofsh falë që je vlla i kujt je, se sa për aftësitë dhe doktoraturat tua nuk t’kish ra me dal fort në sheher nga arat e fushat e Gllanasellës duke luajtur ‘pitpitak.”, tha ai.

Tutje, mulla Osmani tha se Lladrovci duhet “t’ua puth këmbët” atyre të cilëve u ka borxh për pozitën në të cilën është. “Sa për kryetar e votë të qytetarëve, ti duhet tua puthësh këmbët disave në krah të të cilëve je aty e të cilët fatkeqësisht janë në burg. Frikohem se ndaj tyre do këndosh si bilbil, se në Komunë veç me nxjerr naj dokument kishe shku ndonjëherë”, tha Musliu për Reporterin.