Kina thotë se nuk ka asnjë viktimë nga coronavirusi që tri javë

Advertisment

Kina tha të martën se ka regjistruar vetëm një rast të ri me coronavirus dhe asnjë viktimë.

Bazuar në këtë raportim, në Kinë janë bërë tri javë prejse është regjistruar viktima e fundit nga COVID-19, sëmundja që e shkakton coronavirusi.

Reklame

Komisioni Kombëtar i Shëndetit tha se 395 pacientë janë duke u trajtuar në spitale, ndërsa 949 persona janë të izoluar dhe nën vëzhgim, pasi kanë dalë pozitivë në testet për coronavirus ose dyshohet se mund të jenë të infektuar.

Kina – ku coronavirusi ka shpërthyer për herë të parë në fund të vitit të kaluar – ka raportuar për 4,633 vdekje nga coronavirusi dhe për 82,881 persona të infektuar në total.

Të dhënat e fundit vijnë në kohën kur akuzat Kinë-SHBA për origjinën e coronavirusit, janë ashpërsuar.

Më 3 maj, sekretari amerikan i Shtetit, Mike Pompeo, ka thënë se ka prova se coronavirusi ka dalë nga një laborator në qytetin Vuhan të Kinës.

Kina është përgjigjur duke thënë se pretendimet e tilla janë “çmenduri”.

Organizata Botërore e Shëndetësisë ka thënë se pretendimet e SHBA-së janë spekulative. /rel/