Kush do të jenë bartësit e listave për deputetë të koalicionit ASH- Alternativa?!

Koalicioni Aleanca për Shqiptarët dhe Alternativa pritet të caktojë kandidatët për listat për deputetë për zgjedhjet e 12 prillit.

Organet partiake, përfshirë degët e këtyre dy partive pritet që gjatë kësaj jave të nisin me nominimet e kandidatëve për listat për deputetë. Megjithatë tashmë jozyrtarisht janë mësuar disa nga emrat që do të jenë bartës të listave për deputetë, në 4 njësitë zgjedhore ku do të konkurrojë ky koalicion.

Reklame

Siç mëson INA, në njësinë numër 1 zgjedhore përflitet që bartës të jetë Bekim Sali, stomatologu që vjen nga radhët e Alternativës.

Në njësinë numër 2 do të garojë kryetari i Alternativës, Afrim Gashi. Nuk dihet se ky koalicion a do të ketë kandidat në njësinë e tretë zgjedhore.

Në njësinë numër 5 zgjedhore që përfshin Strugën dhe Dibrën pritet që bartës të jetë deputeti i deritanishëm i ASH-së, Syrja Rashidi, ndërsa në njësinë numër 6 do të prijë kreu i ASH-së, Ziadin Sela.

Ndërkohë, akoma kanë mbetur hapur pozitat e tjera dhe se pritet të nominohen shumë emra, kryesisht nga figura të njohura reprezentuese të këtij koalicioni. Shefat e shtabeve të këtij koalicioni janë sekretarët e përgjithshëm, Arben Taravari nga ASH dhe Skender Rexhepi nga Alternativa.(INA)