Pas arritjes së koalicionit me ASH në, Gashi me apel për aktivistët e Alternativës

Advertisment

Pas arritjes së koalicionit në mes ASH-së dhe Alternativës, është nxehur debati edhe në rrjetet sociale, sidomos nga aktivistët e opozitës të cilët kanë qenë shumë të ashpër me njëri tjetrin, duke ofenduar madje edhe duke kërcënuar, shkruan Gazeta Express.

Gjatë ditës së sotme, ka reaguar kryetari i Alternativës, Afrim Gashi, i cili ka bërë apel deri tek aktivistët e tij që të mos përhapin gjuhë të urrejtjes.

Reklame

Postimi i plotë i Gashit:

“Të dashur aktivistë të Alternativës, Ashtu si po afrohet fushata, po rritet edhe presioni i opinionit publik. Mundësia që secili të shprehet, veçmas përmes rrjeteve sociale, sa është e mirë për ata që i zgjedhin fjalët, shpesh del të jetë edhe e dëmshme për njerëzit që nuk janë të kujdesshëm me fjalët e tyre. Prandaj, duke parë se disa nga kundërshtarët tanë nuk zgjedhin fjalë për të na sharë, baltosur e ofenduar dhe duke e ditur se kjo ju lëndon dhe ju shkakton dhimbje, po ju drejtohem duke ju lutur deri në qiell që askush nga ju të mos e prishë zemrën dhe mos ta ndyjë gojën! Ju lutem shumë, mos lejoni që ato provokime të jenë shkak që edhe ju të shani, të përgojoni e të ofendoni.

Meqë e kemi thënë që në krye të herës se “beteja jonë është, mbi të gjitha, për vlera”, dua t’ju lus të jeni të kujdesshëm dhe ta dini se për neve nuk është me rëndësi vetëm fitorja në zgjedhje, por janë me rëndësi edhe mjetet e fitores. Unë nuk e dua një fitore që e ka lënduar zemrën e dikujt, që e ka ofenduar familjen e dikujt dhe që e ka dëmtuar dikë, qoftë ai dëmtim me fjalë ose me çfarëdo tjetër. Nëse i besoni idesë sonë, nëse i besoni vizionit tonë, ju lutem përmbahuni nga çdo fjalë e rëndë dhe besoni fuqimisht se kjo është rruga e vetme që neve na shpie në një fitore të këndshme. Secilit që ju shan kthejani me një buzëqeshje dhe me një fragment nga oferta jonë.

Sepse dikush është i uritur edhe për një buzëqeshje e dikush edhe për një informacion për ne. Njerëzit presin nga ne zgjidhje për hallet e tyre dhe jo nënçmime e përgojime. Andaj detyra jonë është që ta shpërndajmë ofertën tonë për mirëqenien e tyre dhe të përgëzojmë me lajmin e mirë të fitores, por assesi të shërbehemi me fyerje dhe fjalë të liga. Mbani mend se ai që shan, së pari e ka ndyrë gjuhën e tij, e ka turpëruar veten e tij dhe e ka poshtëruar familjen e tij. Pastaj i ka bërë dëm subjektit dhe krejt shokëve të tjerë. Për këtë arsye unë dua të besoj se te ne nuk kanë vend ato vese. Beteja e virtytshme është sigurisht më e mirë se fitorja e ndyrë”, përfundon apeli i Gashit.