Pas gruas, Enver Hoxhën e ndjek edhe sekretaresha

Tre ditë pas vdekjes së Nexhmije Hoxhës në moshën 99-vjeçare, një tjetër ish-figurë grua e regjimit komunizmit shqiptar, Vito Kapo, është shuar në moshën 97-vjeçare. E njohur dhe si e veja e Hysni Kapos, një prej ish-figurave të larta të regjimit, Vito Kapo ka qenë një ndër gratë më afër Enverit që në vitet e luftës, pasi ka kryer dhe detyrën e sekretares personale të ish-diktatorit.

Megjithatë, profili i saj publik ngjau kurrë me atë të Nexhmijes së ndjerë, si e damkosur si “bashkëautorë në krim” me bashkëshortin e saj Enverin.

Reklame

Vito Kapo qe figurë regjimi, ndër më kryesoret, por pa xanxa mbi shpinë. Edhe pas viteve ’90, në ato pak prononcime mediatike, tejet të kursyera, i është shmangur komenteve politike.

Ja një jetëshkrim i shkurtër i saj:

U lind më 9 nëntor 1922 në Nivan të Zagorisë, e bija e dr. Stathi Kondit dhe Krisanthisë; motër e Pirro, Alqiut dhe Tanës.

Më 1941 mbaroi Institutin Femnor “Nana Mbretneshë” të Tiranës.

Në vitet 1942-43 u mpleks me grupet komuniste dhe u bë pjesë e Grupit Komunist të Shkodrës.

Në shkurt-maj 1942 shërbeu si mësuese në fshatin e lindjes.

Gjatë luftës u ndodh në Nivan, Konispol e Përmet.

Më 1943-44 qe anëtare e sekretare organizative e Komitetit Rajonal të Partisë Komuniste për Gjirokastrën.

Në korrik-nëntor 1944 punoi si sekretare e Enver Hoxhës pranë shtabit të përgjithshëm në Helmës dhe Odriçan.

Në nëntor 1944 gjer në maj të 1945 qe në Komitetin Qendror të PK-së dhe e ngarkuar me Bashkimin e Grave Antifashiste Shqiptare.

Pas marrjes së fuqi të komunistëve, në korrik 1945 gjer në maj 1946 punoi atashe shtypi në legatën shqiptare në Beograd, ku i shoqi shërbeu si ambasador.

Më vonë u emërua Drejtoreshë e Arsimit të Lartë dhe për një kohë shumë të gjatë ka drejtuar Bashkimin e Grave të Shqipërisë.

Ka qenë gjithashtu ish-ministre e Industrisë së Lehtë në vitet 1987-1990. /tesheshi.com/