Presidenti i Tanzanisë shpall kapitullimin e koronavirusit: Zoti na dëgjoi, e larguam me lutje

Advertisment

Presidenti i Tanzanisë, John Magufuli, e shpalli vendin pa koronavirus dhe kjo sipas tij u mundësua falë lutjeve nga qytetarët.

“Sëmundja korona është eleminuar falë Zotit,” u tha z. Magufuli adhuruesve në një kishë në kryeqytet, Dodoma.

Reklame

Organizata Botërore e Shëndetit (OBSH) ka shprehur shqetësimin për strategjinë e qeverisë kundër Covid-19.

Qeveria ka ndaluar publikimin e të dhënave për numrin e rasteve të koronavirusit në vend.

Më 29 Prill, dita e fundit kur u publikuan të dhënat zyrtare, pati 509 raste infeksioni dhe 21 vdekje në Tanzani.

Sidoqoftë, Z. Magufuli tha javën e kaluar se vetëm katër pacientë ishin duke marrë trajtim në qytetin më të madh, Dar es Salaam.

Muajin e kaluar, qeveria e Tanzanisë hodhi poshtë një paralajmërim të ambasadës amerikane se spitalet në Dar es Salaam ishin “të mbingarkuara” dhe se shanset për kontraktimin e virusit ishin “jashtëzakonisht të larta”.

Z. Magufuli ka thënë vazhdimisht se kriza shëndetësore është ekzagjeruar dhe i ka nxitur njerëzit të ndjekin shërbime në kisha dhe xhami, duke thënë se lutjet “mund të mposhtin” virusin.

“Dua të falënderoj tanzanianët nga të gjitha besimet.

Ne kemi qenë duke u lutur dhe duke agjëruar që Zoti të na shpëtojë nga pandemia që ka prekur vendin tonë dhe botën.

Zoti na është përgjigjur.

Unë besoj dhe jam i sigurt se shumë tanzanianë besojnë se sëmundja e koronës është eliminuar nga Zoti”, u tha ai adhuruesve të dielën në Dodoma.

Deklaratat e tij u pritën me duartrokitje dhe ulërima festive.

Magufuli gjithashtu lavdëroi priftin dhe adhuruesit që nuk mbanin doreza dhe maska për tu mbrojtur nga virusi./Ora News.tv/