SHBA: Infermieri rezulton pozitiv me koronavirus 6 ditë pas vaksinimit

Një infermier i cili ka marrë vaksinën Pfizer më 18 dhjetor ka rezultuar përsëri pozitiv me COVID-19.

45-vjeçari nga San Diego tha se pasi bëri vaksinën kishte dhimbje krahu, ndërsa kishte vijuar punën normalisht me pacientët e prekur nga COVID-19.

Reklame

Por, gjashtë ditë më vonë ai shfaqi simptomat e COVID-19, temperaturë, dhimbje muskulore dhe lodhje. Pas bërjes së testit ai rezultoi se ishte pozitiv me COVID-19, pavarësisht se kishte gati një javë që kishte marrë vaksinën.

Lidhur me rastin ka folur Christian Ramers, specialisti i sëmundjeve infektive në Qendrat Shëndetësore në San Diego, i cili u shpreh se vaksinat nuk krijojnë në mënyrë të menjëhershme mbrojtje të pacientit.

“Ne e dimë nga provat klinike të vaksinës që do të duhen rreth 10 deri në 14 ditë që ju të filloni të zhvilloni mbrojtje nga vaksina,”-është shprehur specialisti.

Sipas tij, edhe pas atyre 10 deri 14 ditë, pacientët ende kanë nevojë për një dozë të dytë vaksine për mbrojtje të plotë.

“Ajo dozë e parë mendojmë se ju jep diku rreth 50% dhe ju duhet ajo dozë e dytë për të arritur deri në 95%,” shtoi Ramers./ Opinion.al