Shqiptarët të bllokuar në një aeroport në Itali, ishin shitur më shumë bileta

Advertisment

Emigrantët shqiptarë bllokohen në aeroportin e Bolonjës. Mësohet se kanë qenë 40 pasagjerë të cilët kanë mbetur në terminal për disa orë ndërsa nuk merrnin asnjë sqarim nga autoritetet shqiptare.

Shkak për këtë problem mësohet se ka qenë një gabim në sistemin e kompanisë “Air Albania” e cila ka prerë më shumë bileta se kapaciteti i avionit duke krijuar në këtë mënyrë kaos.

Reklame

Alban Daci një qytetar shqiptar që ka shoqëruar të afërmit e tij të cilët do të udhëtonin me “Air Albania” drejt Shqipërisë thekson se një situatë e tillë është absurde dhe e papranueshme.

“Në avionin e linjës “Air Albania” ishin edhe 6 të afërm të mi. Në momentin që paraqiten në aeroport, kuptojnë që janë prerë 40 bileta më shumë se kapacitetet e avionit.

Avioni është nisur duke lënë 40 pasagjerë të tjerë që ishin më shumë se kapaciteti i pranueshëm nga “Air Albania”. Më vonë janë akomoduar me një hotel në Bolonja, të cilëve u është ofruar një darkë skandaloze”, shprehet ai.

Shpeshherë shqiptarët janë përballuar me vonesa dhe anulime të papritura të fluturimeve ndërsa nuk ka pasur asnjë reagim të autoriteteve përkatëse.

“Në 10 vitet e fundit kemi pasur shumë raste të tilla. Shqiptarët braktisen nëpër porte, aeroporte. Lihen jashtë në të ftohtë në të nxehtë. Presin orë të tëra linjat e avionëve të cilët nuk kanë asnjë lloj shpjegimi se përse nuk nisen, apo nisen me vonesë. Është një histori 10-vjeçare, një histori e turpshme”, shprehet ai.

Familjarët e Dacit do të udhëtonin në Shqipëri pasi kishin një fatkeqësi dhe janë detyruar të qëndrojnë në hotel deri në nisjen e avionit tjetër.

Pas një pritje të gjatë në aeroport pasagjerët pritet të udhëtojnë nga Bolonja drejt Shqipërisë me një tjetër avion gjatë së premtes./abcnews.al