#

Kryetari i Komunës së Gostivarit dhe Sekretar i përgjithshëm i partisë Aleanca për Shqiptarët, Arben Taravari paralajmëron për përkeqësimin e situatës me pandeminë në vend pas zgjedhjeve dhe si shkas për këtë e theksoi mosrespektimin e protokolleve për mbrojtje kundër përhapjes së virusit gjatë fushatës parazgjedhore.

“Përshtypja ime është dhe për fat të keq mund të konstatoj se pothuajse askush nuk i përmbahet protokolleve. Personalisht dhe në partinë ku jam anëtar, e respektojmë dhe ruajmë distancën e përcaktuar ndërmjet karrigeve, por përsëri ka një grupim njerëzish dhe kjo është shumë shqetësuese. Ky fenomen është i pranishëm jo vetëm në Gostivar, por edhe kudo në vend. Sjellja gjatë fushatës do të japë rezultatet brenda një muaji”, tha Taravari.

I pyetur për një koment më të saktë për çfarë rezultate mendon, ai theksoi se kjo i referohet rritjes enorme të numrit të personave të infektuar me koronavirus dhe komentoi se pas zgjedhjeve përveç deputetëve të rinj do të kemi edhe shumë më tepër pacientë të rinj.