“Perceptimi jo vetëm i imi por edhe i opinionit është se gjithçka që ndodh në arsim gishti duhet t’i drejtohet MASH-it, veçanërisht kur ndodhin ose kur paraqiten aspektet negative, sepse për atë që është e mirë sigurisht se askush nuk të lëvdon dhe nuk duhet pritur, sepse ajo është punë e një bartësi të një funksioni”, thotë ministri i Arsimit dhe Shkencës, Abdilaqim Ademi

Intervistoi: Sh. Lushaj

Arsimi shqip has probleme serioze, për zgjidhjen e të cilave ministri i Arsimit Shkencës Abdilaqim Ademi zotohet t’i zgjidhë. Në intervistën e gjatë për “Zhurnal”, Ademi konstaton problemet dhe propozon zgjidhjet, premton një strategji që duket e vështirë por vizionare. Ministri, në këtë intervistë, flet për të gjitha çështjet aktuale që lidhen me arsimin, por edhe për sulmet ndaj tij në opinion. Ai sqaron edhe reformën e paralajmëruar në arsimin e lartë dhe këmbëngul se qëllimi i saj është rritja e cilësisë dhe jo dëmtimi i studentëve

Zhurnal: Zoti ministër, s’ka pak që janë mbushur 100 ditë nga ardhja juaj në krye të Ministrisë së Arsimit dhe Shkencës. Ç’e dallon këtë periudhë? Çfarë është ajo që keni planifikuar dhe keni realizuar ose nuk ia keni dalë ta realizoni?

Abdilaqim Ademi: Ajo që e karakterizon këtë 100-ditësh është fakti se qeverinë e përbëjnë partitë e njëjta dhe në njëfarë mënyrë programi ka qenë vazhdimësi e programit të Qeverisë së kaluar. Kështu është edhe në sferën e arsimit, ku disa projekte kanë pasur vazhdimësinë e tyre. Në këtë 100-ditësh filloi edhe viti i ri shkollor dhe viti akademik që, në vlerësimin e MASH-it, filluan me sukses. Kuptohet me përjashtime në disa shkolla, ku kishte probleme fillimisht, por që në bashkëpunim me komunat, prindërit dhe mësimdhënësit, arritëm t’i tejkalojmë.

I tillë është rasti në shkollën e Rashçes, ku me Komunën e Sarajit kemi filluar edhe aktivitetet për përgatitjen e dokumentacionit teknik dhe hapjen e tenderit për rikonstruktimin e tërësishëm të objektit. Më pas ishte edhe problemi i nxënësve të fshatit Slivnik të Velesit, ku kam kontaktuar me prindërit dhe tani duhet edhe t’i vizitoj me qëllim që t’ua kumtoj edhe atyre lajmin se MASH në bashkëpunim edhe me Komunën e Velesit, do ta rindërtojë dhe mbindërtojë edhe shkollën e tyre.

Pastaj kishte edhe disa probleme, nëse mund t’i quaj kështu, rreth përdorimit të gjuhës, përfaqësimit të drejtë e kështu me radhë. Kërkesa të arsyeshme të prindërve këto, sepse bëhet fjalë për të drejta të cilat i garanton Kushtetuta dhe ligjet dhe që në fakt nuk duhet të jenë kërkesa të prindërve, sepse ato duhet institucionet t’i përmbushin paraprakisht.

Teksa jemi te problemet, dua të theksoj edhe faktin se arsimi fillor dhe i mesëm është i decentralizuar dhe komunat kanë kompetenca të plota në këtë sferë. Dua të them se edhe komunat do të duhen të rrisin kapacitetet e tyre për menaxhim më të suksesshëm të arsimit fillor dhe të mesëm, të mos presin fillimin e vitit shkollor, shtatorin, për t’i shpalosur problemet e tyre, por duhet ta shfrytëzojnë pushimin e verës dhe t’i shqyrtojnë problemet, por edhe t’i tejkalojnë ato, veçanërisht në lidhje me projektet, objektet, mirëmbajtjen e tyre, por edhe ta përmirësojnë atë që mund të konsiderohet si dobësi e vitit të kaluar shkollor.

MASH, ministria e dytë për nga buxheti

Zhurnal: Në këtë periudhë u dorëzua për votim në Kuvend edhe buxheti për vitin 2015. Sa mjete do t’i akordohen MASH-it dhe cilat janë prioritetet e saj në shfrytëzimin e tyre?

Abdilaqim Ademi: Buxheti është rreth 300 milionë euro. MASH është ministria e dytë që ka buxhet më të madh në kuadër të të gjitha ministrive. Kemi projekte që do të duhet të vazhdojnë të realizohen, por ka edhe projekte të reja që janë risi të këtij buxheti, siç janë mjetet e siguruara për projektimin dhe fillimin e ndërtimeve për kampusin universitar në Shkup, për objektin e Institutit të Trashëgimisë Shpirtërore dhe Kulturore të Shqiptarëve, për ndërtimin e objekteve të Fakultetit të Edukatës Fizike dhe të Fakultetit të Shkencave të Informatikës, në kuadër të Universitetit “Shën Cirili dhe Metodi”.

Më pas, për sigurimin e mjeteve financiare për UEJL-në, me qëllim që shteti të tregojë një vlerësim për të gjithë atë që është punuar në atë universitet dhe veçanërisht për kontributin e komunitetit ndërkombëtar për të ndërtuar një institucion të mirëfilltë të arsimit të lartë për shqiptarët në Maqedoni, dhe një sërë projektesh të tjera që ne do t’i fillojmë vitin e ardhshëm.

Drejtorët kanë detyra, nuk emërohen për të bërë punësime

Zhurnal: Kemi vënë re sigurisht se për problemet me të cilat ndeshen shkollat, rëndom akuzohet MASH. Ndërkohë, dominon edhe një mendim se relacionet mes shkollave, komunave dhe MASH-it nuk funksionojnë si duhet. Cila është qasja juaj në këtë drejtim?

Abdilaqim Ademi: Unë jam thuajse tre muaj e gjysmë ministër i Arsimit dhe Shkencës dhe me siguri që këtë periudhë e kam shfrytëzuar për të analizuar edhe aspektet ligjore, por edhe kompetencat, dhe atë që nënkupton menaxhim i mirëfilltë i arsimit ose, më saktë, i institucioneve arsimore.

Perceptimi jo vetëm imi por edhe i opinionit është se gjithçka ndodh në arsim gishti duhet t’i drejtohet MASH-it, veçanërisht kur ndodhin ose kur paraqiten aspektet negative, sepse për atë që është e mirë sigurisht se askush nuk të lëvdon dhe nuk duhet pritur, sepse ajo është punë e një bartësi të një funksioni. Kjo edhe për faktin që ne dalim nga një sistem ku gjithçka ka qenë e centralizuar, por edhe për faktin se ne kemi kaluar në fazën e decentralizimit të thellë, veçanërisht në sferën e arsimit, dhe prandaj unë shpeshherë kam ftuar edhe komunat që të rrisin edhe kapacitet e tyre për menaxhim më të mirë të arsimit, por edhe drejtorët e shkollave.

Sepse drejtorët e shkollave nuk emërohen vetëm për të ndjekur procesin edukativo-arsimor, ose për t’u marrë se kush do të punësohet e kush jo, por në radhë të parë për të menaxhuar me shkollën. Kështu që të gjitha hallkat e sistemit të arsimit duhet të funksionojnë, që të kemi proces të mirëfilltë edhe të procesit edukativo-arsimor, por edhe të menaxhimit të mirë.

Drejtorët duhet të bëjnë detyrën e tyre për sa u përket prioriteteve dhe këtë ta koordinojnë me krerët e komunave. Drejtorët janë kompetentë edhe për higjienën në objektin dhe oborrin e shkollës. Ka aktivitete që nuk kërkojnë implikime të mëdha financiare, por vetëm një menaxhim më të mirë nga ana e drejtorëve. Kemi raste kur në një shkollë janë të punësuar 5 punëtorë për higjienë dhe nëse e vizitojmë atë shkollë mund ta shohim se ajo nuk mirëmbahet mjaftueshëm. Kemi raste kur shkolla është ndërtuar para 4 ose 5 viteve dhe nëse sot e vizitojmë, për fat të keq do të konstatojmë se ajo nuk mirëmbahet.

Prandaj jo gjithmonë ministri dhe kryetari i komunës mund t’i kryejnë punët e një drejtoi të shkollës, por ata do të duhej vetë të menaxhojnë shkollën. Mund t’jua them një rast eklatant që kam hasur, kur mjetet buxhetore që janë në dispozicion të një shkolle, harxhohen për reprezantacion të drejtorit, ose për kontrata për mirëmbajtjen për kopshtin, të cilin shkolla nuk e posedon. Prandaj them që secili në hallkën e zinxhirit të menaxhimit të institucioneve arsimore duhet të kryejnë punën e tyre.

Duam ta rikthejmë respektin për mësuesin

Zhurnal: Nga sa folët deri tani, rezulton se marrja përsipër e zgjidhjes së problemeve të arsimit përbën një sfidë. A keni plan konkret për të kapërcyer të gjitha këto vështirësi?

Abdilaqim Ademi: Sigurisht që është mirë kur flitet për anët negative dhe për gjërat jo të mira në arsim, me qëllim që të arrijmë deri te një zgjidhje ose konkluzion se si duhet t’i tejkalojmë ato. Kuptohet se përveç menaxhimit të institucioneve arsimore, rol kyç kanë edhe mësimdhënësit. Roli e shtylla kryesore në procesin edukativo-arsimor sigurisht që është mësuesi. Ne kemi filluar dhe po përgatisim një reformë më të thellë në fakultetet pedagogjike që do të përfshijë disa etapa, duke filluar nga politika e regjistrimit se kush mund të regjistrohet në fakultetet pedagogjike dhe në ato që prodhojnë kuadrin që do të angazhohet në arsim, nëpërmjet stimulimit për t’u regjistruar në këto fakultete, trajnimin e tyre dhe ndjekjen e karrierës në të ardhmen. Do të stimulomë nëpërmjet bursave nxënësit më të mirë që të regjistrohen në këto fakultete dhe këto bursa do të jenë 50 për qind nga rroga mesatare në vend. Pastaj do të stimulojmë me bursë të gjithë ata që do të regjistrohen në Akademinë për Mësues dhe bursa do të jetë në lartësinë e një rroge mesatare dhe do të miratojmë një ligj të posaçëm për mësimdhënësit, ku do të caktohen kriteret se kush mund të jetë mësimdhënës në të ardhmen, si dhe do të kemi ndjekjen ose zhvillimin e karrierës së mësimdhënësve. Secili kualifikim sigurisht se do të shoqërohet me mjete financiare, pra me rrogë më të mirë për mësimdhënësit.

Duam në njëfarë mënyre që të kthejmë respektin për mësuesin që për momentin mungon, respektin që ne, gjenerata jonë, e kemi pasur për mësuesit. Duam që mësuesi të ketë rolin kyç në procesin edukativo-arsimor. Kjo mund të arrihet në radhë të parë nëpërmjet depolitizimit të arsimit dhe në radhë të dytë nëpërmjet rritjes së kapaciteteve për prodhimin e kuadrove të ardhshme arsimore. Më e rëndësishmja është që të kemi mësues ose mësimdhënës që do të jenë kompetentë për lëndën që e ligjërojnë.

Sulme personale për probleme që i kam trashëguar

Zhurnal: Medie të ndryshme ju kanë vendosur në qendër të kritikave për probleme të caktuara në arsim. A nuk mendoni se është paksa e pandershme që të kritikoheni ad hominem, vetëm pak muaj pas marrjes së detyrës, për probleme që ju i keni trashëguar nga paraardhësit tuaj?

Abdilaqim Ademi: Problemet që ngrihen nëpër mediume janë probleme që në një fare mënyrë janë të pranishme në arsim. Mirëpo janë probleme të trashëguara dhe të krijuara me vite të tëra dhe unë nuk e kam ndër mend asnjëherë që të merrem me mediumet që janë më kritike, të cilat ndonjëherë shkojnë edhe deri te sulmet personale e ndonjëherë mund të ketë edhe ofendime. Konsideroj se liria e shprehjes është e mirë në demokraci , mirëpo edhe mediumet sigurisht se do të duhet të jenë profesionale në informimin e tyre dhe të jenë korrekte. Është korrekte që gjithmonë kur trajtohet një temë të ketë qëndrim nga Ministria, të dihet se cili është qëndrimi i Ministrisë dhe si mund të zgjidhet problemi i cili trajtohet nga mediumi. Unë jam i hapur me të gjitha mediumet për të biseduar për arsimin, sepse konsideroj se edhe mediumet mund të japin kontributin e tyre në ngritjen e vetëdijes, por edhe në trajtimin e drejtë të temave që mund të trajtohen veçanërisht në arsim. Është fakt se për tre muaj nuk mund të zgjidhen as me shkop magjik të gjitha problemet, mirëpo qëllimi im kryesor është të ngre dhe të bëj zgjidhje sistemore, zgjidhje që nuk do të varen nga faktori njeri, veçanërisht nga personi që udhëheq ministrinë ose një institucion arsimor. Këtu e kam fjalën edhe për investimet kapitale dhe përmirësimin e infrastrukturave shkollore, por edhe për përmbajtjen e teksteve shkollore, që është më problematikja për shqiptarët dhe për tema të tjera, siç është testi ekstern, zgjidhja e problemeve me vendimet për arsimtarët që punojnë më shumë vite ne arsim e kështu me radhë.

Zhurnal: Tekstet shkollore duken të jenë problem kronik…

Abdilaqim Ademi: Për momentin jemi duke trajtuar dhe shqyrtuar mundësinë e ndryshimit të Ligjit të Teksteve Shkollore, sepse në bazë të ligjit aktual ka tekste unike që do të thotë se për një lëndë mësimore ka një tekst, mirëpo kjo shkakton probleme për lëndët mësimore që kanë të bëjnë me specifikat e popujve që jetojnë në Maqedoni, veçanërisht me historinë, trashëgiminë kulturore, artin figurativ dhe artin muzikor, gjuhën dhe të tjera.

Duam që të paktën për këto lëndë të ketë tekste alternative ose edhe nëse ngelim në qëndrimin që të jenë tekste unike, të trajtohen edhe specifikat e popujve që jetojnë në Maqedoni, sepse këtë e garanton Kushtetuta që në preambulën e saj, ku popujt trajtohen si pjesë e ndarë e popujve që jetojnë jashtë trojeve të Maqedonisë.

Realitet mungesa e cilësisë së arsimit shqip

Zhurnal: Ka një perceptim të përgjithshëm se arsimi është zhvilluar në mënyrë të pabarabartë ose, më saktë, se ka një raport të zhdrejtë mes cilësisë së arsimit maqedonas dhe atij shqiptar. Cilat janë, sipas jush, pikat neuralgjike të arsimit shqip dhe ç’planifikoni të ndërmerrni?

Abdilaqim Ademi: Jo vetëm që është perceptim dhe përshtypje, por kjo është realitet, dhe unë këtë kam arritur ta konstatoj tani me punën time disamujore në Ministri. Problemet e arsimit veçanërisht të arsimit shqip janë të shumëllojta, në krahasim me atë maqedonas. Dhe kjo jo për faj të shqiptarëve dhe jo të atyre që janë të përfshirë në mënyrë të drejtpërdrejtë në procesin edukativo-arsimor, por për faj të sistemit i cli me vite të tëra e ka izoluar arsimin shqip dhe nuk ka investuar mjaftueshëm edhe në ngritjen e kapaciteteve njerëzore, për mësues dhe profesorë, por edhe në ndërtimin e infrastrukturës shkollore.

Problemi tjetër është edhe ai i teksteve shkollore, i përmbajtjes së tyre, që duke pasur tekst unik për një lëndë mësimore, për shqiptarët ato duhet të përkthehen nga gjuha maqedonase dhe këtu hasim në përkthime të dobëta, pastaj në gabime teknike që ndonjëherë quhen teknike, por që për mua nuk janë, janë të qëllimshme, me qëllim për ta dëmtuar arsimin shqip. Pastaj me përmbajtjet kontestuese të disa teksteve shkollore e veçanërisht në ato që kanë të bëjnë me specifikat e popullit shqiptar dhe me mungesën e institucioneve të arsimit të lartë, të cilët do të duhet të prodhojnë kuadrin i cili pastaj do të jetë i angazhuar në procesin edukativo-arsimor.

Pastaj kemi edhe problemin e përfshirjes së nxënësve shqiptarë në profile të ndryshme, ku mungojnë këto profile, dhe veçanërisht në shkollat e mesme profesionale. Dhe duke munguar ato, nxënësit detyrohen të regjistrohen në ato profile për të cilat ata nuk janë të aftë për të studiuar më tutje, dhe në këtë mënyrë atyre u cenohet jo vetëm e drejta për të zgjedhur profilin e caktuar, por u cenohet edhe e drejta për zhvillimin e karrierës së mëtejshme.

Sigurisht se ka edhe probleme kur flasim edhe për kuadrin. Sepse duke pasur mungesë të kuadrit, edhe ai kuadër i mirëfilltë dhe cilësor që ka qenë i angazhuar në shkollat e mesme e kryesisht në gjimnaze, angazhohet në institucione të ndryshme arsimore, kurse zëvendësimi i tyre nuk është bërë me kuadër adekuat. Në këtë kuptim, është krijuar një boshllëk shumë i madh sa i takon zëvendësimit por edhe i zhvillimit të mirëfilltë të procesit edukativo-arsimor.

Prandaj reforma pedagogjike që përmenda, mendojmë se është e domosdoshme me qëllim krijimin e kuadrit adekuat që do të angazhohet më tej në shkollat fillore dhe të mesme.

Nuk do të cenohet autonomia e universiteteve

Zhurnal: Testi ekstern në shkollat fillore dhe të mesme duket sikur ka gjetur një mirëkuptim të përgjithshëm. Por paralajmërimi për zbatimin e këtij modeli në arsimin universitar ka sjellë reagime të shumta. Cili është qëllimi i kësaj reforme? Argumenti kryesor që përdoret për të kundërshtuar këtë reformë është cenimi i autonomisë së universiteteve. Cila është e vërteta, sipas jush?

Abdilaqim Ademi: E para, qëllimi kryesor është që ne të rrisim cilësinë e arsimit të lartë dhe e dyta, me diplomë universitare të pajiset vetëm ai i cili e meriton atë. Pra, ai i cili studion dhe ai i cili në mënyrë të rregullt do të ndjekë studimet. Nuk është qëllimi që ne të cenojmë autonominë e universiteteve dhe ne ende nuk kemi dhënë një model se si do të zhvillohet provimi shtetëror, sepse ne këtë kur e kemi thënë jemi udhëhequr edhe nga përvojat e vendeve të tjera, veçanërisht të BE-së, sepse një vlerësim të tillë ekstern ka në Danimarkë, në Finlandë, në Britani të Madhe dhe në një sërë vendesh të tjera. Bile në Danimarkë, në vlerësimin e ekstern, përveç profesorëve dhe institucioneve shtetërore, përfshihen edhe kompanitë private, me qëllim që ato të japin vlerësimin e jashtëm, sepse kuadrot që prodhohen në universitete nesër do të punësohen edhe nëpër kompanitë private dhe ato janë shumë të interesuara që të kenë kuadrin adekuat i cili do të jetë i pajisur me aftësitë dhe shkathtësitë e nevojshme për të punuar në këto kompani.

Pse u përcaktuam dhe duam të instalojmë edhe këtë filtër të kontrolli? Sepse tek unë ose në Ministri vijnë informata të ndryshme, për shembull ka universitete të caktuara që për të qenë më atraktive për studentët, jo në mënyrë të mjaftueshme zhvillojnë programin e tyre studimor. Dhe jo gjithmonë i angazhojnë studentët që të jenë të rregullt në ligjërata dhe ushtrime dhe brenda 4 vitesh të gjithë pajisen me një diplomë.

Ka raste të tjera kur studentët nga vendet jashtë Maqedonisë vijnë dhe regjistrohen në fakultetet dhe universitet tona dhe nuk dinë asnjë fjalë në gjuhën maqedonase ose shqipe, varësisht se në cilën gjuhë studiojnë, dhe në fund pajisen me diplomë. Ka studentë që nuk vijnë fare në ligjërata dhe në fund i marrin të gjitha provimet dhe pajisen me diplomë. Ne nuk duam që të jemi shtet policor dhe në çdo moment të sillemi me inspektorat dhe kontrolle nëpër universitetet, sepse kjo do të linte një pasqyrë jo të mirë për shtetin, por duam të ndërtojmë mekanizma që do ta masnin dijen e secilit student për periudhën e caktua. Nëse ai është i rregullt dhe nëse e ka dhënë vetë provimin, sigurisht se nuk do të ketë asnjë problem në vlerësimin ekstern.

Ideja e provimit shtetëror nuk është që të bllokojë studentin që të mos vazhdojë më tutje, por të masë dijet e tij se sa janë reale dhe nëse provimet që ai i ka dhënë deri atëherë i ka dhënë vetë ose i ka ndjekur studimet e rregullta. Sigurisht që ne jemi në fazën e analizave dhe të debatit publik dhe unë ftoj secilin që mendon se mund të japë një kontribut për këtë temë, lirisht të prononcohet dhe të dërgojë propozime deri te Ministria, sepse ne do të marrim parasysh secilin propozim dhe secilën vërejtje dhe sugjerim, që mund të japin palët e interesuara.

Deri tani, nga sa shoh unë, më të zëshëm janë ata që ndoshta janë të prekur nga kjo ide, dhe zakonisht më të zëshëm janë gjithmonë ata që ose për arsye politike deklarohen, ose u cenohet ndonjë interes i tyre, për ndonjë temë të caktuar.

Fund për studimet trevjeçare

Zhurnal: Në idenë tuaj është që vlerësimin e jashtëm ta kryejë një organ shtetëror, jashtë universiteteve, apo? Çfarë tjetër përfshin kjo reformë?

Abdilaqim Ademi: Ne ende nuk kemi vendosur se cili model do të aplikohet në Maqedoni dhe sigurisht që nëse vendosim të ketë vlerësim ekstrern, këtë do ta bëjmë në bashkëpunim me universitetet dhe do të marrim edhe mendimin e tyre. E thashë që në asnjë mënyrë nuk do të lejojmë të cenohet autonomia e universiteteve. Autonomia cenohet nëse institucionet shtetërore kanë implikime ose dëshirojnë të vënë nën kontroll universitet, kështu që do të gjendet një formë ose model i cili do të ishte i aplikueshëm për të arritur qëllimin, por edhe model i cili nuk do të cenonte autonominë e universiteteve.

Kur flasim për këtë reformë do të shohim mundësinë edhe të shqyrtimit të Procesit të Bolonjës në disa aspekte, sepse disa aspekte do t’i ruajmë. Ne duam të vazhdojmë kohëzgjatjen e studimeve, të mos ketë studime 3-vjeçare dhe të mos ketë vetëm provime me shkrim, por edhe me gojë. Sepse konsiderojmë se me mënyrën interaktive, edhe të ligjërimit, edhe të dhënies së provimit, profesori mund ta vlerësojë më mirë studentin, nëse i nënshtrohet provimit me gojë. Gjithashtu këtë e mendojmë dhe duam ta aplikojmë edhe për një arsye, sepse tek ne vijnë edhe informata të ndryshme. Kemi informata se studentët kur futen në provim pajisen me pajise elektronike që studenti tjetër nga jashtë t’i diktojë dhe ai studenti në provim të plotësojë testin. Në këtë mënyrë ai e jep provimin pa e ditur lëndën dhe nëse i njëjti student i nënshtrohet edhe provimit me gojë, sigurisht se profesori do të ketë pasqyrë më të qartë për studentin.

Angazhim për të depolitizuar arsimin

Zhurnal: Çështja më e rrahur në muajt e fundit është ajo e emrave të katër shkollave në Çair, si rasti, ndoshta, më i politizuar pas legalizimit të USHT-së. Ndërkohë, keni deklaruar se zgjidhja do të ndodhë brenda këtij viti. Ka shumë kureshtje për ta parë zgjidhjen…

Abdilaqim Ademi: Kam deklaruar shpesh se vendimet në MASH janë vendime që kur merren kanë impakt edhe në sfera të tjera të shoqërisë. Prandaj dua që çdo vendim të merret nëpërmjet debatit dhe konsultimit të të gjitha palëve të tanguara. Prandaj them se zgjidhja do të jetë zgjidhje që do të përfshijë në vetvete dhe në vendimmarrje prindërit, shkollat, komunat, ministritë, dhe vendimi do të merret bashkërisht dhe në atë moment kur ne do të konstatojmë bashkërisht se ky vendim do të ketë efekte minimale negativ dhe minimale në sfera të tjera të shoqërisë. Zgjidhja do të ndodhë brenda këtij viti kalendarik, por sigurisht ne nuk do të ngutemi me vendime të shpejta.

Zhurnal: Greva e arsimtarëve, megjithatë, nuk u zhvillua. Aktualisht po zhvillohet dialogu në nivel të grupeve të punës. Ju personalisht, a mendoni se në zhurmnajën e krijuar me grevën, ka politikë?

Abdilaqim Ademi: Për fat të keq në çdo aktivitet, prapa tij fshihen edhe qëllime politike, edhe përkrahje politike. Unë do të doja që sa më pak politikë të ketë në arsim dhe unë do të angazhohem që këtë ta përkrahë deri në fund, pra që të ketë sa më tepër depolitizim të arsimit. Mirëpo për mua ishte indikativ edhe fakti se në 100 ditët e para Sindikata e Arsimit u përcaktua për grevë edhe pse që këto probleme kanë qenë prezanto edhe në vitet e kaluara, kur me Ministrinë kanë udhëhequr ministra maqedonas dhe tani iu kujtua Sindikatës që për kërkesat dhe për avancimin e të drejtave të tyre. Do të doja që sa më pak të ketë politikë, veçanërisht në këto aktivitete dhe nuk do të doja të besoj që Sindikata të jetë motivuar edhe etnikisht për grevën.