Sektori i biznesit dhe personat e papunë njihen me subvencionimet nga ana e shtetit

Agjencinë për Punësim në bashkëpunim ne Ministrinë e Punës dhe Politikës Sociale, , UNDP-së dhe Komunës së Gostivarit, realizuan forum me pjesëmarrje të përfaqësuesve të sektorit të biznesit dhe të rinjve të papunësuar. Qëllimi i forumit të mbajtur në Gostivar, ishte informimi me masat e ndërmarra qeveritare për subvencionime gjatë punësimit. “Takimi u mbajt me qëllim që më për së afërmi dhe më konkretisht t’i informojmë për masat aktive të cilat janë paraparë në planin operativ të qeverisë për zvogëlimin e papunësisë. Punëdhënësit informohen për punësim sa më të madh të personave të papunë të cilët janë në listën aktive të Agjencinë për Punësim”, tha Hisam Hamzai, drejtor në Agjencinë për Punësim në Gostivar. Hamzai njoftoi se punësimi i personave të papunë dhe që janë shfrytëzues të ndihmave sociale, mbetet prioritet i tyre. “Masë më interesante dhe më konkrete është punësimi i personave të evidentuar si të papunë dhe të cilët shfrytëzojnë ndihmë sociale dhe të cilët mund të angazhohen në të gjitha masat aktive, kurse shteti u mundëson disa masa shumë të favorshme për angazhimin në punë të kësaj kategorie”, tha Hamzai. Vetëm gjatë vitit 2014, në Gostivar u angazhuan në punë rreth 400 qytetarë.