Forumi Rinor Islam shtroi iftarin tradicional në sheshin “Skënderbeu” në Shkup. Në këtë iftar, i cili për herë të parë u realizua në bashkëpunim me organizatën joqeveritare nga Republika e Turqisë “Iyilikder”, të pranishëm ishin afër 500 mysafirë të shtresave e përkatësive të ndryshme, mes tyre përfaqësues të institucioneve, përfaqësues të organizatave joqeveritare, donatorë, studentë.
Pas përfundimit të iftarit fjalë rasti patën nënkryetari i Forumit Rinor Islam, Berat Limani, kryetari i degës së FRI-së në Shkup, Abdulhamid Mustafa, kryetari i komunës së Çairit, Izet Mexhiti si dhe në fund edhe përfaqësuesi i organizatës joqeveritare “Iyilikder”, Muhamed Geçen.
Iftar për afër 500 qytetarë u shtrua edhe në qytetin e Kumanovës, organizuar nga Forumi Rinor Islam në bashkëpunim me komunën e Kumanovës. Iftari u mbajt në qendrën e qytetit, ku të pranishëm ishin qytetarë të përkatësive të ndryshme etnike e fetare, si dhe përfaqësues të institucioneve të ndryshme.
Fjalë rasti pati kryetari i degës së FRI-së në Kumanovë, Liridon Ismaili si dhe nënkryetari i FRI-së në nivel qendor, Berat Limani.
Që të dy iftaret organizohen nga FRI tashmë për shumë vite me radhë, me të cilët synohet bashkimi i qytetarëve për të shijuar kështu bashkërisht vlerat e muajit Ramazan si dhe njohja e kulturës dhe bindjeve të bashkëytetarëve në mes vete.
