Pesë miliardë euro. Kaq po kursejnë qytetarët aktualisht në bankat vendase.
Të dhënat e fundit të publikuara dje nga Banka Popullore e Maqedonisë thonë se depozitat e ekonomive familjare kanë kaluar shifrën e pesë miliardë eurove.
Ose, më saktë, në fund të qershorit të këtij viti, kursimet totale të familjeve ishin në nivelin 5,002 miliardë euro, ndërsa vetëm një muaj më parë ishin 4,951 miliardë euro.
Domethënë për një muaj apo në qershor është regjistruar rritje e depozitave të qytetarëve për një shumë totale prej 51.4 milionë euro.
Ky është sigurisht një moment pozitiv në kushtet e një krize të madhe ekonomike në botë dhe në vend, të shkaktuar nga inflacioni i lartë dhe lufta në Ukrainë.
Në qershor ka edhe një arsye tjetër për një lloj relaksimi të lehtë, e ajo është se depozitat në denarë të qytetarëve janë kthyer në trend rritës, edhe pse rritja e tyre në qershor është modeste dhe arrin në 7,3 milionë euro.
Por nëse merret parasysh se në muajin paraprak, gjegjësisht maj, është regjistruar po aq tërheqje e depozitave në denarë, pra për 7,3 milionë euro, del se në qershor qytetarët i kanë kthyer të njëjtat para në banka.
Konkretisht, në fund të qershorit të këtij viti, depozitat në denarë të qytetarëve ishin në nivelin prej 2,33 miliardë euro, krahasuar me 3,32 miliardë euro një muaj më parë.
Kjo rritje e depozitave të kursimeve në denarë sigurisht vjen edhe për faktin se Banka Popullore e Maqedonisë në disa raste ka rritur bazën e interesit, ku rritja e fundit ka ndodhur diku nga mesi i korrikut dhe ka arritur në plot 0,5 pikë përqindjeje, duke sjellë bazën e interesit deri në 2.5 për qind.
Krahas kësaj, në fillim të këtij muaji, banka qendrore ndërmori një sërë masash të tjera për stimulimin e kursimit në denarë, ndër të cilat ishte vendimi për uljen e rezervës së detyrueshme për detyrimet në denarë nga 6,5 për qind në 5 për qind, duke rritur njëkohësisht normën e rezervës së detyrueshme për detyrimet në valutë nga 16.5 për qind në 18 për qind.
E gjithë kjo kontribuoi që bankat në vendin tonë të fillojnë të rrisin normat e interesit për kursimet në denarë, të cilat më parë ishin në nivel shumë të ulët. Pra, për depozitat e afatizuara në denarë, kamatat në disa banka tashmë janë rritur për dy për qind, dhe dihet se sa demotivuese kanë qenë për qytetarët më parë. Janë duke u zhvilluar edhe një sërë fushatash bankare për depozitat e afatizuara në denarë për një periudhë më të gjatë, me kamatë të rritur dhe fikse.
Ndryshe, rritje janë edhe depozitat në valutë, kryesisht në euro, shumë më tepër në krahasim me depozitat e kursimeve në denarë. Domethënë, në qershor rritja e tyre prej 44 milionë eurosh bëri faktikisht pjesën e “luanit” të rritjes së kursimeve civile nga gjithsej 51 milionë euro.
Në fund të qershorit, depozitat në valutë ishin në nivelin 2,676 miliardë euro, që do të thotë se në banka kemi më shumë kursime në euro sesa në valutë vendase, dhe synimi i BQ-së është të shkojmë drejt denarizimit më të madh të kursimet.
Ndryshe, BQ bëri të ditur se potenciali depozitues i bankave është në rritje.
“Totali i depozitave të sektorit privat në qershor është më i lartë për 0,4 për qind krahasuar me muajin maj, dhe niveli i tyre është 1,8 për qind më i lartë në bazë vjetore. Në të njëjtën kohë, rritja e depozitave të individëve u përshpejtua dhe arriti në 1 për qind në bazë mujore, pra 5.2 për qind në bazë vjetore”, thuhet në deklaratën e Bankës Qendrore.
Është e rëndësishme të theksohet se totali i depozitave në banka, pra ato të qytetarëve së bashku me ato të kompanive, në fund të muajit të gjashtë të këtij viti arritën në 7.4 miliardë euro, ose kanë një rritje prej 33 milionë euro në një muaj. FLAKA
